ЭРХЭД СУУРИЛСАН ЭРҮҮЛ МЭНД

                     

ЛГБТ Төвөөс та бүхнийг урьж байна.

Эрхэд суурилсан эрүүл мэнд чуулган

“Эрхэд суурилсан эрүүл мэнд” чуулган нь эрүүл мэнд болон хүний эрхийг хослуулсан чуулган бөгөөд эрүүл мэндийг хүний эрх талаас харж, Ази номхон далайн бүсийн ЛГБТИ олон нийт болон бусад цөөнх бүлгүүдийн хүн амын хүний эрхийг хүндлэх нь тэдний эрүүл мэндэд эерэгээр нөлөөлөх хүчин зүйл гэдгийг онцлон авч үзэх юм. Бэлгийн мөн чанар, хүйсийн баримжаа болон хөгжлийн бэрхшээл гэх мэт ялгаварлан гадуурхагдсан асуудлуудыг хөндөх нь бидний тэргүүний зорилт билээ. НҮБ-ын Тогтвортой хөгжлийн зорилтын “хэнийг ч орхигдуулахгүй” зарчмыг Ази номхон далайн бүсийн дунд болон дундаас доогуур орлоготой орнуудын хувьд хэрхэн хэрэгжүүлэх талаар хэлэлцүүлэг нь чуулганы хөндөх асуудлуудын хэсэг байх болно.

 

Олон улсын илтгэгч, мэргэжилтнүүд

Профессор Рүүт Макнэйр
Австрали Улс, Мэлбүрны Их сургууль, Анагаах ухааны сургуулийн Ерөнхий ур чадварын тэнхим

Натаниэл Рийд
Австрали Улс, Мэлбүрн хотын Northside эмнэлгийн их эмч

Профессор Нийша Догра

Их Британи, Лээстэрийн Их сургууль, Грийнвүүд эмнэлгийн хүүхэд, өсвөр үеийн сэтгэцийн тасгийн зөвлөх

Кимбэрлий Айвори 

Их эмч, Сиднэйн Их сургуулийн Нийгмийн эрүүл мэндийн сургуулийн багш

Кийнан Рассэл

Трансжендэр Европ байгууллагын НҮБ-ын нөлөөллийн мэргэжилтэн

Рээна Жанамнуайсүүк 

Ази Номхон далайн трансжендэр сүлжээний Удирдах Зөвлөлийн гишүүн, “Танжерийн” хүй олны эмнэлэг

Тус чуулган маань Монгол дахь Австралийн Элчин сайдын яамны шууд тусламжийн төслийн дэмжлэгтэйгээр хэрэгжиж байгаа ба Монголын эрүүл мэндийн салбарт ажилладаг эмч, мэргэжилтнүүд болон цөөнхийн эрүүл мэндээр ажилладаг хүмүүс бүртгүүлэхэд үнэ төлбөргүй. Оролцохыг хүссэн орон нутгийн мэргэжилтнүүдэд зориулсан аяллын болон байрны зардлыг багтаасан тэтгэлэгтэй. Илтгэл хүлээн авах зар, тэтгэлэг болон бүртгэлийн мэдээллийг хавсаргав. Чуулганд оролцсон мэргэжлийн эмч, мэргэжилтнүүдэд Эрүүл мэндийн хөгжлийн газрын кредит оноог багтаасан болно. Энэхүү чуулган нь нийгмийн цөөнх бүлгүүдийн эрүүл мэндийн үйлчилгээг хүний эрхийн линзээр харж, эрүүл мэндийн эрх, хүй олны хөгжлийн асуудлаар ажилладаг эрүүл мэндийн салбарын эмч, мэргэжилтнүүд, оюутнууд, эрүүл мэндийн хүрээнд ажилладаг судлаач, багш, ЛГБТИК, хүний эрх, эрүүл мэндийн чиглэлээр ажилладаг иргэний нийгмийн байгууллагууд болон бусад бие даасан мэргэжилтнүүдийг хамруулах зорилготой.

Илтгэл хүлээн авах зар

ЛГБТ Төвөөс зохион байгуулж буй “Эрхэд суурилсан эрүүл мэнд” олон улсын чуулганд Монголын болон олон улсын оролцогчдыг илтгэлийн хураангуйгаа 2018 оны 3-р сарын 2-ны дотор илгээхийг урьж байна. Сонирхсон оролцогчид хуралд өөрийн биеэр оролцох боломжгүй бол өөрсдийн агуулгыг дижитал хэлбэрээр явуулж болно.

Цөөнхийн эрүүл мэндийн асуудлыг хүний эрхийн өнцгөөс харж, хүний эрхэд суурилсан байдлаар нөхцөл байдлыг дээшлүүлэх чиглэлээр үйл ажиллагаа, төсөл хөтөлбөр, судалгааны ажил хийсэн мэргэжилтнүүдийг чуулганд оролцохыг урьж байна. Ялангуяа бэлгийн чиг баримжаа ба хүйсийн баримжаа, илэрхийлэл буюу ЛГБТИ олон нийттэй ажилладаг, мөн ялгаварлан гадуурхагддаг бусад цөөнх бүлгийн асуудлаар ажилладаг мэргэжилтнүүдийг онцлон урьж байна. Бусад цөөнх бүлэгт: хөгжлийн бэрхшээлтэй иргэд, угсаатны болон хэл, соёл, шашны цөөнх, эмэгтэйчүүд, залуус, алслагдсан бүсийнхэн, цагаач болон дүрвэгсэд.

Чуулганы оролцогчид: Чуулганы оролцогчид маань эрүүл мэндийн салбарын мэргэжилтнүүд байх бөгөөд нийт 100 эмнэлгийн эмч, мэргэжилтнүүдийг эрүүл мэндийн яамны оролцоотойгоор хамруулж байгаа болно.

Чуулганд оролцох: Чуулганд цөөнх бүлэгтэй ажилладаг мэргэжлийн хүмүүс, судлаач, багш болон ТББ-ын төлөөллийг хамруулах бөгөөд хэрэв та тус чуулганд оролцох хүсэлтэй бол энд дарж, дараахь хүснэгтийг 2018 оны 6-р сарын 15-ны дотор бөглөнө үү. Оролцогчдод 2018 оны 6-р сарын 20-ны өдөр дотор эргэж мэдэгдэх тул холбогдох утас, цахим шуудангаа зөв бөглөнө үү.

Чуулганы агуулга:

ЛГБТИ, хөгжлийн бэрхшээлтэй хүмүүс, хэл, соёл, шашны цөөнх хүй олны дундахь халдварт бус өвчний тархалтыг бууруулж, сэтгэцийн эрүүл мэнд болон эрүүл оршихуйн асуудлыг дэмжих хүрээнд:

  • Гэр бүл төлөвлөлт, бэлгийн болон нөхөн үржихүйн эрүүл мэндийн боловсрол мэдээлэл болон үйлчилгээний онцлог хэрэгцээ
  • Архи болон бусад бодисын хэрэглээ болон хор нөлөөг бууруулах
  • Бие махбодийн болон бэлгийн хүчирхийлэл, үзэн ядалтаас үүдэлтэй гэмт хэрэгт хариу үзүүлэх болон бууруулах
  • Чанартай, аюулгүй, хүртээмжтэй үйлчилгээг нэмэгдүүлэх болон боломжтой эм, вакцины хүртээмж, чанарыг сайжруулах
  • Цөөнх бүлгүүдийн эдийн засаг, нийгэм, улс төрийн оролцоог дэмжих, эерэг хандлагыг нэмэгдүүлэх

Тавигдах шаардлага:

  • Хураангуй 250 үгэнд багтаана.
  • Хураангуй нь англи болон монгол хэл дээр байж болно.
  • Хураангуй нь чуулганы зорилготой нийцсэн байх ба 2 хүртэл агуулгыг хамарсан байж болно.

Судалгааны товч агуулга нь Үндэслэл/Арга/Үр дүн/Дүгнэлт/ гэсэн үндсэн стандартын дагуу байна.

Олон нийтийн үйл ажиллагаа болон төслийн товч агуулга нь доорх асуултад товч хариулсан байх:

  • Ямар төсөл/үйл ажиллагаа байсан бэ?
  • Яагаад хэрэгтэй байсан бэ? (Асуудал нь юу байсан бэ?)
  • Судалгаа/үйл ажиллагаа нь хэрхэн асуудлыг гаргаж ирсэн бэ?
  • Юу хийхээр хичээсэн бэ?
  • Үр дүн /санал шүүмжлэл/ амжиллтай байсан зүйл эсвэл тулгарч байсан асуудал юу байв?
  • Дараагийн алхам юу вэ?

Анхаарах зүйл: Панел хэлэлцүүлэг

Хэрэв бид адил төстэй хэд хэдэн илтгэл хүлээн авсан тохиолдолд тэр дундаас нэгийг нь л сонгох бөгөөд илтгэлээ илгээсэн бусад оролцогчдыг тус сэдвийн хүрээнд панел хэлэлцүүлэгт урих боломжтой. Материалаа явуулахдаа та панел хэлэлцүүлэгт оролцох хүсэлтэй байгаа үгүйгээ мөн бидэнд мэдэгдэнэ үү.

Facebook

Twitter

Papercrowd

 

ЛГБТ Төв, info@lgbtcentre.mn                                        | Утас:  +976 77400323

Г. Доржжанцан, rights4health@lgbtcentre.mn           | Утас:  +976 99621165

Фэйсбүүк хаяг: https://www.facebook.com/LGBTtuv                     7 сарын 4-5, Чингис зочид буудал

Вебсайт: www.lgbtcentre.mn                                                                     Улаанбаатар хот, Монгол Улс